Там на горі два явори,
Третій зелененький,
Лежит, лежит у шпитали
Жовнір молоденький.

Лежит, лежит, тяжко дише,
Буде умерати,
А ви, мої товарише,
Дайте мамі знати.

Мама пришла, мама пришла,
Барз ся розплакала,
Ой сину мій дорогенький,
Я тя не познала.

Як же ти мя, моя мамусь,
Маєш познавати,
Кед я лежу такий бідний,
Бо мушу вмерати.

А при войску не ховают
Ни попи, ни дяки,
Лем при войску поховают
Цісарски вояки.