Думаш ти, дівчатко, же то война шпас,
Же побуду тижден, або дві неділі,
Приду домів зас.

Же побуду тижден, або годину,
Зна то пан-біг з неба і панна Мария,
Де я загину.

Заб’ют мене в турка, або в ті Руси,
Неєдна стара мац за своїм синочком
Плакати мусит.

Хцеш, дівчино, знати, який обід мам?
Та печеня кіньска і вода Дунайска –
Такий обід мам.

Хцеш, дівчино, знати, який напій мам?
Та вода студена, з кровію змішена –
Такий напій мам.

Хцеш, дівчино, знати, яку постіль мам?
Одробина місця, під главом таністра –
Таку постіль мам.

Хцеш, дівчино, знати, як мі дзвоняют?
Камаратя мої на тім чистім полі
З гверів стріляют.

Хцеш, дівчино, знати, як мя ховают?
Камаратя мої на тім пустім полі
Ями копают.

Хцеш, дівчино, знати, хто за мном плаче?
На тім чистім полі, на могилі мої
Ворона краче.