Зродилися терки за горами,
Підеме ми на ні з кошиками;
Будеме торгати, будеме ламати
З конарями.

Пришов би я до вас каждий вечір,
Жеби сте мі дали, што би я хтів:
Тото дівча шварне, што ма очка чорни,
То би я хтів.

Пришов би я до вас каждий вечір,
Жеби сте мі дали, што би я хтів:
На мисочку лену і шварну Олену,
То би я хтів.

Пришов би я до вас каждий вечір,
Пред вашими дверми велька мочар,
Прелож, мила, дручки, пройду помалючки,
Каждий вечір.

Пришла би-м я до вас, кед би-м сміла,
Жеби сте мі дали, што би-м хтіла:
Того шугаїчка, што ма чорни очка,
То би-м хтіла.