А не є то на свеце, як молоді невесце,
Муж є в Гамерице, (2) сама робі што хце.

А муж в Гамерице робит на таляри,
А она купує (2) паробкам цигари.

– А купуй, жено, купуй, кед маш за што куповац,
Іде ти там стівка, (2) можеш ю скельтовац.

– А виход же, мій мужу, до свойого краю,
Най тя твої діти (2) тівко не чекают.

– А што же мі за діти, што я о них не знам,
Кед юж седем рочків, (2) як я з тобов не спав?

– А я шати рейбала, о тобі я думала,
Тади я, мій мужу, (2) і в тяжи зостала.

– Не циган ти, жено, же ти шати рейбала,
Але повідж правду, (2) же-с фраїра мала.