Там за нашом хыжом,
Єст зелена грушка,
Похылила ся єй
Зелена галузка.

Галузь ся схилила,
Вершок ся єй зломал,
Парадный паробок
С дівками в карты грал.

Як грали, так грали,
Полягали спати,
Прилетіл білый птах
Почал их зганяти.

Вставай, Ганцьо, гори,
Дост ты ся выспала,
Бо уж твой віночок
Быстра вода взяла.

Як она го взяла,
Та най сой го несе,
Она мні го зопре
В калиновом лесе.

В калиновом лесе
Вода древко несе,
Сідит на нем дівча
Дробны власы чеше.

Чесала, чесала,
Горенько плакала,
Же уж свой віночок
На картах програла.

Ой вінку, мой вінку,
С дробного барвінку,
Як я тя тримала
В скрині, в перескринку.

Не моглам я тебе,
Долше затримати,
Пришли добры люде
Мусілам тя дати.